काठमाडौँ।
दक्षिण अफ्रिकामा जारी आईसीसी यू–१९ महिला टी–२० विश्वकप क्रिकेटमा हिजोदेखि सुपर सिक्सका खेल सुरु भएका छन् । समूह १ मा अष्ट्रेलियाले भारतलाई ७ विकेटले र आयोजक दक्षिण अफ्रिकाले बंगलादेशलाई ५ विकेटले हराएको छ ।
समूह २ मा इङ्ल्यान्डले आयरल्याण्डलाई १२१ रनले र न्युजिल्यान्डले रुवाण्डालाई ४ विकेटले हराएको छ ।
टस हारेर ब्याटिङ गरेको भारतीय टोलीले १८.५ ओभरमा ८७ रन मात्रै अल आउट भएको थियो, जसको जवाफमा अस्ट्रेलियाले १३.५ ओभरमा तीन विकेट गुमाएर जित हात पारेको थियो ।
अष्ट्रेलियाकी सिएना जिङ्गरले १३ रनमा तीन विकेट लिईन तर सुरुमा १२ रनमा दुई महत्वपूर्ण विकेट लिने मिली इलिङ्वर्थ खेलको प्लेयर अफ द म्याच घोषित भइन ।
टस जितेर ब्याटिङ गरेको बंगलादेशले २० ओभरमा ६ विकेट गुमाएर १०६ रन बनाएको थियो, जसको जवाफमा दक्षिण अफ्रिकाले १८.५ ओभरमा ५ विकेट गुमाएर जित हासिल गरेको थियो।
दक्षिण अफ्रिकाकी काइला रेनेकले सर्वाधिक ४ विकेट लिइन् तर ३७ रनको महत्वपूर्ण इनिङ्स खेल्ने म्याडिसन ल्यान्ड्सम्यानलाई प्लेयर अफ द म्याच घोषित गरियो।
पहिले खेलेको इङ्ल्यान्डले २० ओभरमा २ सय ७ रन बनाएको थियो, जसको जवाफमा आयरल्यान्डको टोली १६.५ ओभरमा ८६ रन बनाएर अलआउट भयो। हन्ना बेकरले ९ रन दिएर सर्वाधिक ३ विकेट लिइन् ।
५६ बलमा ९३ रन बनाएर एक विकेट लिएकी ग्रेस स्क्रिभेन्सलाई खेलको उत्कृष्ट खेलाडी घोषित गरिएको थियो । रुवाण्डाले २० ओभरमा ७ विकेट गुमाएर ९६ रन बनाएको थियो जसको जवाफमा न्युजिल्यान्डले १६.१ ओभरमा ६ विकेट गुमाएर जित हात पारेको थियो ।
एम्मा म्याक्लियोडले ३९ बलमा ५९ रन बनाएकी खेलकी प्लेयर अफ द म्याच घोषित भइन् । महिला यू–१९ टी–२० विश्वकपमा भारतले समूह १ मा श्रीलंकासँग र २२ जनवरीमा सुपर सिक्सको समूह २ मा वेस्ट इन्डिजले रुवाण्डासँग खेल्नेछ ।
