काठमाडौं।
छैटौं संस्करणको महिला साफ च्याम्पियनसिप फुटबल प्रतियोगिता आज मंगलबारबाट काठमाडौंमा सुरु हुँदैछ । त्रिपुरेश्वरस्थित दशरथ रंगशालामा आयोजना हुने प्रतियोगिताको उद्घाटन युवा तथा खेलकुद मन्त्री महेश्वरजंग गहतराजले गर्ने तालिका रहेको छ ।
प्रतियोगिताको उद्घाटनमा नेपालले आज भुटानको सामना गर्नेछ । दशरथ रंगशालामा हुने नेपाल र भुटानबीचको खेल साँझ ५:३० बजे सुरु हुनेछ ।साविक उपविजेता नेपाल आज भुटानलाई हराउँदै सुखद सुरुआत गर्ने योजनामा हुनेछ । तर, अन्डर डग टोली भुटानविरुद्ध नेपाल शतर्क भएर खेल्नेछ ।
नेपालले भुटानमाथि हालसम्म गोलको वर्षा गरेको छ ।नेपालले आफ्नो महिला फुटबलको इतिहासमा भुटानको तीन पल्ट सामना गरेको छ ।महिला साफ च्याम्पियनसिपको तीन खेलमा नै जित हासिल गरेको छ । नेपालले सबैभन्दा भुटानको सामना गरेको भनेको सन् २०१४ को संस्करणमा भएको थियो।
पाकिस्तानको इस्लामावादमा भएको थियो । त्यसमा नेपाल ८–० ले विजयी भएको थियो । दोस्रो भेट २०१६ को भेट सिलगुढीमा भएको थियो। त्यसमा पनि नेपाल ८–० ले नै विजयी भएको थियो । यी दुई टिमबीचको तेस्रो खेल भने सन् २०१९ मा विराटनगरमा भएको थियो, जसमा नेपालले ३–० ले हात पारेको थियो । समग्रमा भन्दा नेपालले भुटानविरुद्ध तीन खेलमा कुनै गोल त खाएको छैन् ।नेपालले उल्टै २० गोल गरेको छ। नेपालकी सावित्रा भण्डारीले मात्र आठ गोल गरेकी छिन्।त्यसमा एक दोहोरो ह्याट्रिक पनि सामेल रहेको छ ।
नेपाली राष्ट्रिय महिला टिमकी नवनियुक्त कप्तान एन्जिला तुम्बापो सुब्बाले पहिलो पटक महिला साफ फुटबल च्याम्पियनसिपको उपाधि जित्न प्रयास गर्ने बताएकी छिन् । काठमाडौंमा सोमबार आयोजित प्रि-म्याच कन्फरेन्समा बोल्दै कप्तान एन्जिलाले घरेलु मैदानमा उपाधि जित्न प्रयास गर्ने बताएकी हुन् ।
‘अन्तिमसम्म मैदानमा लड्ने छौँ । हामी गोर्खाली हौँ । पहिलो पटक उपाधि जित्न सबै प्रयास गर्ने छौँ,’ एन्जिलाले भनिन्। कप्तान एन्जिलाले आफुमा गरिएको विश्वासलाई गुम्न नदिने समेत बताईन । ‘मलाई कप्तान बनाउनु भएकोमा धन्यवाद। त्यो विश्वासलाई गुम्न दिने छैन,’ एन्जिलाले भनिन् । एन्जिलाले आफ्नो कप्तानीमा टिमलाई उपाधि दिलाउने इच्छा रहेको समेत बताईन् ।
‘कप्तान हुने इच्छा सबैमा हुन्छ । मलाई पनि आफ्नो कप्तानीमा उपाधि जित्ने मन छ । यो पटक मलाई टिमप्रति विश्वास छ । अहिले बोल्नु भन्दा मैदानमा देखाउने छौँ,’ एन्जिलाले थपिन ।
प्रतियोगितामा आयोजक नेपाल, भारत, श्रीलंका, भुटान, बंगलादेश, पाकिस्तान र माल्दिभ्सको सहभागिता रहेको छ ।साफले सहभागी ७ टोलीलाई दुई समूहमा विभाजन गरेको छ ।
समूह ‘ए’ मा साविक विजेता भारत, माल्दिभ्स, बंगलादेश र पाकिस्तान रहेको छ ।यस्तै समूह ‘बी’ मा आयोजक नेपाल, श्रीलंका र भुटान रहेको छ ।समूह चरणको खेलपछि समूहको शीर्ष दुई टोलीले सेमिफाइनलमा स्थान बनाउने छन् । फाइनल खेल असोज ३ गते हुनेछ ।
नेपाली टिमका मुख्य प्रशिक्षक कुमार थापाले प्रि-म्याचमा भुटानलाई कमजोर नआक्ने बताएका थिए ।यस्तै नेपालले दोस्रो तथा समूह चरणको अन्तिम खेलमा भदौ २८ गते श्रीलंकासँग खेल्नेछ ।
