काठमाडौं।
केन्या जाने नेपाली क्रिकेट टोलीका सबै सदस्यको भिसा अझै अन्योलमा छ । अघिल्लो दिन केन्यासँग ५ ट्वान्टी–२० अन्तर्राष्ट्रिय र ३ एकदिवसीय शृंखला खेल्नका लागि नेपाली टोलीका १४ सदस्य नैरोबी लागे पनि ७ जनाको भिसा नआउँदा उनीहरू काठमाडौंमै रोकिएका थिए ।
व्यवस्थापक सुनील महासेठ, ट्रेनर भारतका अब्दुल सतार तथा ५ खेलाडी बसिर अहमद, शाहब आलम, आदिल अलाम, विवेक यादव र सोमपाल कामी भिसा नआएका कारण सोमबार जान पाएका थिएनन् । मंगलबार राति १० बजेसम्मको स्थितिमा व्यवस्थापक महासेठ, खेलाडी सोमपाल र विवेकको भिसा आएको छ ।
ट्रेनर सतार र तीन खेलाडीको भिसा अझै आइपुगेको छैन । नेपाल क्रिकेट संघ (क्यान) का म्यानेजर विनोद दासले मंगलबार रातभरमा सबै खेलाडीको भिसा आइसक्ने विश्वास दिलाए । ‘केन्या क्रिकेटले अघिल्लो दिन नै २४ घण्टाभित्र बाँकी रहेका सबैको भिसा आउने बताएको थियो, त्यहीअनुसार अहिले पालैपालो ३ जनाको भिसा आयो,’ उनले भने ‘हामीले सबैको एकै पटक भिसा एप्लाइ गरेका हौं, भिसा नआएकाको फलोअप गर्दा पेन्डिङ छ भनेर जवाफ आएको छ ।’
भिसा आएका ३ तीन जना कहिल्यै जाने भने निश्चित छैन । भिसा आएपछि सबैलाई एकै पटक प्रयास गरिने म्याननेजर दास बताउँछन् । नेपालले बिहीबार केन्यासँग शृंखलाको पहिलो खेलका रूपमा ट्वान्टी–२० अन्तर्राष्ट्रिय खेल्दै छ ।
मंगलबार रातभरमा बाँकी चारको भिसा आएमा सातै जनालाई बुधबार केन्या पठाउन सकिने उनले बताए । ‘केन्या क्रिकेटले भिसा नआएका ७ जनाको टिकट होल्ड गरेर राखेका छन् । भिसा आएको खण्डमा उनीहरू बुधबार साँझ नैरोबी पुग्नेछन्,’ दासले भने ।
तर चार जनाको भिसा नआएको खण्डमा शृंखला अन्योल बन्नेछ । मंगलबार साँझ नैरोबी पुगिसकेका १४ सदस्यीय टोलीमा ११ खेलाडी छन् । ११ खेलाडीको भरमा बिहीबार पहिलो खेल खेलिने सम्भावना नरहेको दास जनाउँछन् । नेपाली खेलाडी पुगेपछि मात्र खेल हुने भएकाले उनले निर्धारित तालिकालाई पुनर्तालिका गरिनसकेको बताए ।
दासले भने, ‘अहिलेसम्म तोकिएको तालिकाअनुसार नै यथावत् छ । पुनः तालिका गर्ने सम्भावना छैन, हाम्रा खेलाडी गएपछि मात्र खेल हुन्छ । केन्या क्रिकेटले भनेअनुसार नै हामी अगाडि बढेका थियौं, यसमा हाम्रो कुनै दोष छैन, त्यही भएर हाम्रो टिम पूरा भएपछि मात्र खेल्नेछ ।’
यस अघिको खेल तालिका अनुसार नेपालले ५ खेलको टी-ट्वान्टी सिरिज भदौ ९ बाट १४ गते सम्म हुनेछ ।३ खेलको एकदिवसीय सिरिज भने भदौ १७ बाट २० सम्म चल्नेछ ।दुबै सिरिज नैरोवीस्थित जीमखाना मैदानमा हुनेछ ।
नेपाल र केन्याबीच सुरुआतमा ५ खेलको टी-ट्वान्टी सिरिज हुनेछ । त्यसपछि एकदिवसीय सिरिज हुनेछ ।नेपाल र केन्याबीचको पहिलो टी-ट्वान्टी भदौ ९ गते बिहान ११:४५ बजे सुरु हुनेछ ।
दोस्रो टी-ट्वान्टी भदौ १० गते बिहान ११:४५ बजे सुरु हुनेछ । तेस्रो टी-ट्वान्टी भदौ १२ गते बिहान ११:४५ बजे सुरु हुनेछ ।चौथो टी-ट्वान्टी भदौ १३ गते बिहान ११:४५ बजे सुरु हुनेछ ।
पाँचौ तथा अन्तिम टी-ट्वान्टी भदौ १४ गते बिहान ११:४५ बजे सुरु हुनेछ । पहिलो खेल भदौ १७ गते बिहान ११:४५ सुरु हुनेछ ।दोस्रो खेल भदौ १८ गते बिहान ११:४५ सुरु हुनेछ ।तेस्रो खेल भदौ २० गते बिहान ११:४५ सुरु हुनेछ ।
