काठमाडौं।
अखिल नेपाल फुटबल संघ (एन्फा)ले नेपाली राष्ट्रिय फुटबल टोलीका कार्यवहाक मुख्य प्रशिक्षक प्रदिप हुमागाईसँग दुई लाख रुपैयाँको सम्झौता गरेको छ ।
एन्फा स्रोतका अनुसार बंगलादेशविरुद्धको मैत्रीपूर्ण खेलका लागि टोली प्रशिक्षणको जिम्मेवारी पाएका हुमागाई र एन्फाबीच दुई लाख रुपैयाँको सम्झौता भएको हो ।
साउन २६ मा बसेको कार्यसमिती बैठकले असोज ११ गते त्रिपुरेश्वरस्थित दशरथ रंगशालामा हुने बंगलादेशविरुद्धको मैत्रीपूर्ण खेलका लागि हुमागाईलाई कार्यवहाक प्रशिक्षकमा नियुक्त गरेको थियो ।
मुख्य प्रशिक्षक अब्दुल्लाह अल्मुताइरी बिदामा बसेको भन्दै एन्फाले हुमागाईलाई कार्यवहाक प्रशिक्षकको जिम्मेवारी दिएको थियो ।गैरअवासीय नेपाली हुमागाईले शुक्रबारबाट टोली प्रशिक्षण सुरु गरिसकेका छन् ।
टोली प्रशिक्षणको जिम्मेवारी दिए पनि एन्फासँग सम्झौता नभएका कारण हुमागाईको श्रम स्विकृती आइसकेको छैन । श्रम स्विकृतीका लागि एन्फाले आइतबार हुमागाईसँग सम्झौता गरेको हो ।
‘कार्यवहाक प्रशिक्षक हुमागाईको श्रम स्विकृती आइसकेको छैन;,स्रोतले भन्यो, ’श्रम स्विकृतीका लागि सम्झौता आवश्यक पर्ने भएकाले एन्फाले आइतबार सम्झौता गरेको हो । जसअनुसार उनले दुई लाख रुपैयाँ प्राप्त गर्नेछन् । त्यस्तै अमेरिकाबाट नेपाल आएको र उता फर्कने हवाई टिकटका साथै यहाँको यातायात भत्ता उपलब्ध गराउने सहमती भएको छ । उनका लागि एन्फाले करिब ६ लाख रुपैयाँ खर्चनु पर्ने देखियो । ‘
अल्मुताइरीको अनुपस्थितीमा सहायक प्रशिक्षक किरण श्रेष्ठलाई कार्यवहाक प्रशिक्षकको जिम्मेवारी दिनसक्ने अवस्था भए पनि राजनितिक दबाब र व्यत्तिगत स्वार्थका कारण हुमागाईलाई कार्यवहाक प्रशिक्षकको जिम्मेवारी दिएका कारण एन्फामाथि आर्थिक भार समेत पर्ने देखिएको छ ।
‘एन्फा अहिले आर्थिक संकटबाट चलिरहेको छ’,स्रोत भन्छ, ‘सहायक प्रशिक्षक श्रेष्ठ अथवा नेपालमै रहेका अन्य प्रशिक्षकलाई कार्यवहाक प्रशिक्षकको जिम्मेवारी दिएको भए आर्थिक भार कम हुने थियो । तर चुनाव जिताउन सहयोग गरेको भन्दै राजनितिक शत्तिलाई रिझाउन गरिएको नियुक्तीले एन्फामाथिको आर्थिक भार थप बढ्ने देखिएको छ ।’
