काठमाण्डौ।
अबुधाबी टी १० लिगको छैटौं दिन कुल दुई खेल खेलिएका छन् । यस अवधिमा न्युयोर्क स्ट्राइकर्स र नर्दन वारियर्सले आ–आफ्ना खेल जितेका छन् । यी दुवै खेलमा धेरै खेलाडीको प्रदर्शन उत्कृष्ट रह्यो । डेभिड मलान र किरोन पोलार्ड जस्ता खेलाडी असफल भए पनि पहिलो खेलमा न्यूयोर्क स्ट्राइकर्सले मोरिसभिल साम्प आर्मीलाई १२ रनले पराजित गरेको थियो ।
टस जितेर पहिले ब्याटिङ गरेको न्युयोर्क स्ट्राइकर्सले निर्धारित १० ओभरमा ८ विकेट गुमाएर ११० रन बनाएको थियो । पल स्टर्लिङले १३ बलमा ३४ र आजम खानले २१ बलमा ३ चौका र ५ छक्का प्रहार गर्दै ४७ रनको धमाकेदार इनिङ्स खेले ।
मोरिसभिलका ड्वेन प्रिटोरियस र करिम जनातले ३–३ विकेट लिए ।जवाफमा मोरिसभिलको टोलीले ५ विकेट गुमाएर ९८ रन मात्र बनाउन सक्यो ।मोइन अलीले २५ बलमा ४२ रन बनाए पनि टोलीलाई जित दिलाउन सकेनन् ।
यस प्रतियोगितामा मोरिसभिल साम्प आर्मीको यो पहिलो हार हो तर यसका बाबजुद पनि उनी दोस्रो स्थानमा छन्। यता दोस्रो खेलमा नर्दन वारियर्सले चेन्नई ब्रेभ्सलाई ३४ रनले पराजित गरेको थियो ।
पहिले ब्याटिङ गरेको नर्दन वारियर्सले निर्धारित १० ओभरमा ३ विकेट गुमाएर १४१ रन बनाएको थियो ।उस्मान खानले २४ बलमा ६ चौका र ५ छक्का प्रहार गर्दै ६५ रनको उत्कृष्ट इनिङ खेले ।एडम लिथले पनि २५ बलमा अविजित ५४ रन बनाए ।
जवाफमा चेन्नई ब्रेभ्सको टोलीले ५ विकेट गुमाएर १०७ रन मात्रै बनाउन सकेको थियो । कार्लोस ब्राथवेटले १३ बलमा २६ र जेम्स फुलरले १६ बलमा अविजित ३६ रन बनाए पनि टोलीलाई जित दिलाउन सकेनन् । नर्दन वारियर्स दोस्रो जित हात पार्दै अंक तालिकाको तेस्रो स्थानमा छ ।
