काठमाडौँ ।
रोबर्ट लेवान्डोस्कीले विश्वकप फुटबल प्रतियोगितामा एक दशक लगाए । विश्वकपमा एक गोल गर्दा पनि इतिहास बन्छ । अझ कुनै खेलाडीले ह्याट्रिक गरेको अवस्थामा थुप्रै रेकर्ड नै बन्छन् ।
विश्वकपमा एक गोल गर्नु खेलाडीको सपना हुन्छ । सन् १९९४ को विश्वकपमा रसियाका ओलेग सालेन्कोले यस्तो रेकर्ड बनाए, जुन अहिलेसम्म पनि अजेय रहेको छ ।
सो विश्वकपमा रसियाले क्यामरुनविरुद्ध ६–१ को सानदार जित निकालेको थियो । सो खेलमा ओलेग सालेन्को चम्किएका थिए । विश्वकप इतिहासमै रसियाले फराकिलो अन्तरले जित निकाल्दा सालेन्कोले पाँच गोल एक्लैले गरेका थिए ।
खेलको १५औँ मिनेटमा क्यामरुनको कमजोर डिफेन्सको फाइदा उठाउँदै उनले पहिलो गोल गरे । सालेन्कोले मध्यान्तरअघि नै ह्याट्रिक पूरा गरिसकेका थिए ।
खेलको ४४औँ मिनेटमा उनले डिबक्सभित्र सहजै गोल गरी प्रतियोगितामा पहिलो ह्याट्रिक गर्न सफल भए । सालेन्को यतिमै रोकिएनन् । उनले खेलको ७२औँ र ७५औँ मिनेटमा थप दुई गोल गरे ।
खेलमा उनी नै म्यान अफ दी म्याच भए । क्यामरुनबाट कीर्तिमानी रूपमा रोजर मिलाले खेलको ४६औँ मिनेटमा एक गोल फर्काएका थिए । सालेन्कोले रसिया टोलीबाट आठ अन्तर्राष्ट्रिय खेलमा ६ गोल गरेका छन् ।
यसअघि उनी युक्रेनी टोलीमा थिए । युक्रेनबाट सन् १९९२ मा एकपटक अन्तर्राष्ट्रिय खेलमा सहभागी भएका सालेन्कोले करिअर रसियन क्लबमै बिताए । क्लबस्तरीयमा उनले दुई सय ४८ खेलमा ८६ गोल गरेका छन् ।
यो पनि पढ्नुहोस्: फिफा विश्वकपमा आज आठ टिम भिड्दै, कुनकुन टिम कतिबेला भिड्दैछन?
फिफा विश्वकप अन्तर्गत आज चारवटा खेल हुँदैछन्। आज हुने पहिलो खेलमा समूह ‘जी’ का क्यामरुन र सर्बिया भिड्दैछन। अल जानोउब स्टेडियममा खेल पौने ४ बजे सुरु हुनेछ। समूहमा यसअघिको खेलमा दुबै टोलीले पराजय ब्यहोरेका थिए।
आज हुने दोस्रो खेलमा समूह ‘एच’का दक्षिण कोरिया र घाना भिड्दै छन्। एजुकेसन सिटी स्टेडियममा खेल साँझ पौने ७ बजे सुरु हुनेछ। कोरिया आफ्नो पहिलो खेलमा उरुग्वेसँग गोलरहित बराबरीमा रोकिएको थियो भने घानाले पोर्चुगलसँग ३-२ गोलअन्तरले पराजय ब्यहोरेको थियो।
तेस्रो खेलमा समूह ‘जी’का ब्राजिल र स्वीजरल्याण्ड स्टेडियम ९७४ मा भिड्ने भिडने छन्। आफ्नो पहिलो खेलमा जित निकालेका यी दुबै टोली लगातार जित निकाल्दै नकआउट चरणको यात्रा सुनिश्चित गर्ने होडमा हुनेछन्। ब्राजिलले यसअघि सर्बियालाई २-० गोलअन्तरले हराएको थियो भने स्वीजरल्याण्डले क्यामरुनलाई १-० गोलअन्तरले हराएको थियो।
आज राति हुने चौथो खेलमा उरुग्वे र पोर्चुगल भिड्नेछन्। समूह ‘एच’ अन्तर्गतको यो खेल पौने १ बजे लुसइल स्टेडियममा हुनेछ। फिफा विश्वकपमा यी दुई टोलीबीचको यो दोस्रो खेल हो। यसअघि सन् २०१८ को विश्वकपमा पोर्चुगल उरुग्वेसँग पराजित हुँदै प्रतियोगिताबाट बाहिरिएको थियो।
